14 лістапада ў выставачнай зале Віцебскага абласнога метадычнага цэнтра народнай творчасці адбылося ўрачыстае адкрыццё выставы - конкурсу "У роднай хатцы на Віцебскім Паазер'і".
Выстава з'яўляецца часткай праекта "У роднай хатцы", які быў распрацаваны ў мэтах адраджэння вырабу і папулярызацыі вытворчасці побытавых рукатворных рэчаў з лакальнымі і рэгіянальнымі адметнасцямі вясковага і местачковага інтэр’ернага тэкстылю Віцебшчыны.
У 2023 годзе завяршылася першая частка праекта. Было праведзена чатыры абласныя выставы-конкурсы па вясковаму і местачковаму інтэр’ернаму тэкстылю Віцебшчыны (ручное ўзорыстае ткацтва на кроснах, пляценне, вязанне, вышыўка, шыццё з абрэзкаў тэкстылю, набойка, маляванка і інш.)
Другая частка праекта ажыццяўлялася на працягу 2024 года. Паміж калектывамі Дамоў (Цэнтраў) рамёстваў, студыямі (клубамі) майстроў народных мастацкіх рамёстваў праходзіла творчае спаборніцтва па стварэнні экспазіцыйнай прасторы мясцовай вясковай хаты з дэманстрацыяй лепшых твораў інтэр’ернага тэкстылю трох гісторыка-этнаграфічных зон Віцебскай вобласці: Віцебскае Падзвінне, Падняпроўе і Паазер’е.
У абласной выставе-конкурсе ”У роднай хатцы на Паазер’і“, які завяршае двухгадовы праект, прынялі ўдзел майстры народнай студыі майстроў народных мастацкіх рамёстваў і мастакоў-аматараў "Ля возера" НДУК "Браслаўскае раённае аб'яднанне музеяў": Высоцкая Ірына, Шакель Юля, Дзянісава Марыя, Лазука Юля і інш.
У адкрыцці выставы ўдзельнічаў загадчык музея традыцыйнай культуры - Дзянісаў Мікалай Фёдаравіч.
